fikr-e-sud-o-ziyan men rahna hai
bas yahi is jahan men rahna hai
ik kashakash si jaan men rahna hai
jab talak dastan men rahna hai
har taraf asman phaila hai
sab ko ik sa.eban men rahna hai
kal kyuun girta hai aaj gir jaa.e
kaun sa is makan men rahta hai
kitni asaniyan mayassar hain
kitna mushkil jahan men rahna hai
kamra-e-imtihan hai duniya
har ghaḌi imtihan men rahna hai
phir laga.i sabil ankhon ne
phir se ab-e-ravan men rahna hai
aab o gil atish o hava hain ham
aur isi ḳhandan men rahna hai
zindagi puchhte ho kya mujh se
qahqahon ka fughan men rahna hai
fikr har kas ba-qadar-e-himmat-e-ust
ham ko hindostan men rahna hai
sansen maghmum ho ga.iin sun kar
‘ḳhalid’-e-ḳhasta-jan men rahna hai
Leave a Reply