baad muddat jo main ai charkh-e-kuhan yaad aaya
kya sitam koi naya mushfiq-e-man yaad aaya
sher kahta tha ki mazmun-e-dahan yaad aaya
ik muamma ye dam-e-fikr-e-sukhan yaad aaya
ahl-e-duniya ko kisi din na hui fikr-e-adam
kya musafir hain ki jin ko na vatan yaad aaya
dekh kar abr-e-bahari miri nisbat badli
sehn-e-gulshan men dil-e-tauba-shikan yaad aaya
rishta-e-jan men girah pad gai uljhan ke sabab
dil ko jab gesu-e-pur-pech-o-shikan yaad aaya
pa ke sar-chashma-e-haivan jo phir aaya ulta
kya ‘sikandar’ ko tira chah-e-zaqan yaad aaya
mit gai dil ke na hone se vo daghon ki bahar
ai ‘nazar’ vaqt-e-khizan ham ko chaman yaad aaya