zaḳhm-e-dil aur hara ḳhun-e-tamanna se hua
tishnagi ka miri aghaz hi dariya se hua
chubh ga.i halq men kanTon ki tarah pyaas miri
dasht sairab mire abla-e-pa se hua
dil-e-zinda ko chuna dard ki divaron men
rok leti mujhe itna bhi na duniya se hua
sar men sauda tha magar paanv men zanjir na thi
ḳhaak uḌata raha mansub na sahra se hua
pher diin kis ne salaḳhen si miri ankhon men
kaun angusht-numa taq-e-tamasha se hua
duur ja kar miri avaz suni duniya ne
fan ujagar mira a.ina-e-farda se hua
bu mizajon se ga.i rang uḌe chehron ke
ḳhush yahan kaun mire dida-e-bina se hua
ajnabi sa nazar aaya huun ‘muzaffar’ ḳhud ko
be-takalluf jo main is ahd-e-shanasa se hua
Leave a Reply