Ek Kitab Sirhane Rakh Di Ek Charagh Sitara Kiya

Saud Usmani

ek kitab sirhane rakh di ek charagh sitara kiya

malik is tanha.i men tu ne kitna ḳhayal hamara kiya

ye to bas ik koshish si thi pahle pyaar men rahne ki

sach puchho to ham logon men kis ne ishq dobara kiya

chand adhure kamon ne kuchh vaqt girafta logon ne

din purze purze kar Daala raat ko paara paara kiya

dil ko ik surat bhaa.i thi is amboh men par ham ne

jaane is afra-tafri men kis ki samt ishara kiya

sar par taaj ki surat dhar di us ne indhan ki gaThri

ishq ne kaise ḳhush-qismat ko shaah se lakaḌhara kiya

sardi ki aamad thi lekin savan ki rut lauT aa.i

bujhte bujhte ik vahshat men aankh ne ranj dobara kiya