Poet
pyasi thi ye ḳhud mire lahu ki
thi tez chhuri rag-e-gulu ki
dil kho ke na main ne justuju ki
samjha tha ki buund thi lahu ki
tum paas jo aa.e kho ga.e ham
jab tum na mile to justuju ki
sab zaḳhm ke Tanke saath TuuTe
hajat na rahi koi rafu ki
ḳhud kho ga.e ham jahan men aḳhir
is had pe kisi ki justuju ki
dekha ki zamin se aag nikli
jab buund Tapak paḌi lahu ki
roi vahan sham.a yaan hanse phuul
vo qabr miri thi ye adu ki
vo samne aa.e ghash hue ye
muusa ki nazar kahan pe chuki
tiron pe kisi ke baanT bhi duun
khaa.i thi qasam isi lahu ki
is daagh ko main ne dil men rakkha
dushman ne na jis ki aarzu ki
‘javed’ vo laash kyuun uTha.en
marzi bhi to puchh len adu ki
Leave a Reply