Sahiba Sheheryar
mujh ko har lamha na.i ek kahani dega
har kahani men tira rang dikha.i dega
kal jo ik lafz na sunta tha safa.i men miri
aaj vo shaḳhs mire haq men gavahi dega
jis ne qaa.em kiya ye rishta qalam se mera
ab kahan vo mujhe duniya men dikha.i dega
vaqt-e-aḳhir na mulaqat miri us se hui
har ghazal men miri ye nauha suna.i dega
ek misre ki tarah vo to akela hi raha
jab bhi dekhoge akela hi dikha.i dega
kyuun hava tez chali niind se vo jaag paḌa
ḳhvab TuuTa hai to ilzam mujhe hi dega
Leave a Reply