main chahti huun
ki agli rut men milun jo tum se
janam janam ki thakavaton ke khutut chehre se mit chuke hon
qadam qadam ik safar ki pichhli alamaten sab guzar chuki hon
malal-e-sahra-navardi paanv ke ablon men simat chuka ho
musafirat ki tamam ranjish
mire masamon se dhul chuki ho
kisi bhi patthar ka koi dhabba
kisi bhi chaukhat ka koi qarza
miri jabin par rahe na larzan
main chahti huun ki agli rut men milen jo ham tum
damak raha ho yuun mera daman
ki tum jo chaho
namaz padh lo