us gali tak saḌak rahi hogi
raah ab bhi vo tak rahi hogi
rashk badal ko bhi hua hoga
dhuup us par chamak rahi hogi
main bhi kab main huun aise mausam men
vo bhi ḳhud men bahak rahi hogi
dasht-o-sahra ki oT men shayad
ye zamin zaḳhm Dhak rahi hogi
vo bahut ajnabi sa pesh aaya
dil men koi kasak rahi hogi
jo shajar sahn men laga hai ‘arsh’
us pe chiḌiya chahak rahi hogi
Leave a Reply