Jigar Jalandhari
vafa ke barabar jafa chahta huun
tira hausla dekhna chahta huun
har ik dil men ho intiha ki mohabbat
main is daur ki ibtida chahta huun
palak ki jhapak bhi gavara nahin hai
barabar tujhe dekhna chahta huun
har ik saans zanjir lagne lagi hai
main ye silsila toḌna chahta huun
zamane ke gham yaad aane lage hain
tira gham tujhe saunpna chahta huun
koi be-muravvat gale mil raha hai
tujhe jazb-e-dil pujna chahta huun
‘jigar’ phuul sho.ale ugalne lage hain
gulistan ko ab chhoḌna chahta huun
Leave a Reply