umr bhar jis pe takiya raha kuchh na tha dil nahin manta
kya karun tajzyon ka aTal faisla dil nahin manta
kaund kar ek lamha jo phir ja mila vaqt ke abr men
chhoḌ degi use vaqt ki mamta dil nahin manta
ghup-andhere se leti hai kyun-kar janm raushni ki lagan
ye karishma nahin hai kisi sham.a ka dil nahin manta
ḳhushk hi kyuun na ho jaa.e dariya mira lahr ban ban ke main
DhunDhna chhoḌ duun ḳhushkiyon ka sira dil nahin manta
apne markaz ko ik vahm samjha kiya aql ka da.era
jis ko kuchh apne dam-e-kashish ke siva dil nahin manta
us ki tasvir ko dekhte dekhte ye hua kya mujhe
ya.ani behis hai tasvir ki har ada dil nahin manta
dil men kuchh hai zaban se nikalta hai kuchh baat aisi hai kuchh
mera matlab ‘muhib’ koi pa ja.ega dil nahin manta
Leave a Reply