Arshad Abdul Hamid
mere ash.ar tamavvuj pe jo aa.e hue hain
aab hairat se ye mazmun uTha.e hue hain
shoḳhiyan kaam na aa.iin to haya dhar legi
us ne ankhon ko ka.i daav sikha.e hue hain
kuchh sitare miri palkon pe chamakte hain abhi
kuchh sitare mire siine men sama.e hue hain
ab vo insan kahan jin se farishte sharma.en
ham to insan ka bas bhes bana.e hue hain
ghair ko jam.a karo dushman-e-jan ko bulvao
dosto ham kisi apne ke sata.e hue hain
Leave a Reply