kuchh din se uTh rahi hai dil o shahr-e-jan se ḳhaak
jab ham hare bhare hain to aa.i kahan se ḳhaak
phir bhi ye dil dhaḌak uTha us ki pukar par
go us pe la ke Daali thi saare jahan se ḳhaak
chehra aTa hai dhuul se ḳhali hain donon haath
tum aa rahe ho chhan ke aḳhir kahan se ḳhaak
ham is liye bhi us se milate nahin nazar
nisbat zamin ko hai bhala asman se ḳhaak
kal tak hara-bhara tha tira dil mira dimagh
ab kaise uḌ rahi hai yahan se vahan se ḳhaak
a.inda mere saath yahan raftagan bhi hon
so main haTa rahi huun har ik dastan se ḳhaak
jis but ko mera ishq nahin raam kar saka
vo ho sakega mom tumhare bayan se ḳhaak
Leave a Reply