zaḳhm tumhare bhar ja.enge thoḌi der lagegi
be-sabri se kaam liya to aur bhi der lagegi
sahab aaj to apna kaam kara ke ja.enge ham
saari sharten puuri hain phir kaisi der lagegi
yuun behal na ho ai dil bas aate hi honge vo
kal bhi der lagi thi un ko aaj bhi der lagegi
siikh liya hai main ne apne aap se baten karna
fikr nahin un ko aane men kitni der lagegi
kaun ruke ab us ke dar par shaam hui ghar jaa.en
itna zaruri kaam nahin hai jitni der lagegi
itni der men kuchh ke kuchh ho ja.enge halat
ḳhat likhne se ḳhat milne tak jitni der lagegi
mar-gazida kaun bacha hai ‘basir’ shukr karo tum
Thiik bhi ho jaoge lekin ḳhasi der lagegi
Leave a Reply