Faisal Ajmi
kisi ne kaise ḳhazane men rakh liya hai mujhe
uTha ke agle zamane men rakh liya hai mujhe
vo mujh se apne tahaffuz ki bhiik le ke gaya
aur ab usi ne nishane men rakh liya hai mujhe
main khel haar chuka huun tiri sharakat men
ki tu ne maat ke ḳhane men rakh liya hai mujhe
mire vajud ki shayad yahi haqiqat hai
ki us ne apne fasane men rakh liya hai mujhe
shajar se bichhḌa hua barg-e-ḳhushk huun ‘faisal’
hava ne apne gharane men rakh liya hai mujhe
Leave a Reply