har shaḳhs apne aap men simTa hua mila
har ek sochta hai mujhe kis se kya mila
is shahr men guzarta ik umr aur main
vo to ye ḳhairiyat hui banda bhala mila
ya to raha huun ḳhud se hi mahv-e-kalam main
ya phir mujhi sa koi mujhe dusra mila
aaise miri sada ne ta.aqub kiya mira
jaise main ḳhud ko chhoḌ ke auron se ja mila
kuchh ajnabi se chehron ko kal dekhte hue
yadon men aisa kho sa gaya ḳhud se ja mila
manga jo ek bhiiḌ ne kal mujh se rasta
dekha to main hi raah men bikhra hua mila
kyuun ‘talḳh’ tujh ko kaisa laga vaqt ka chalan
andar se koi ajnabi jab TuTta mila
Leave a Reply