zabt ki koshish hai jan-e-na-tavan mushkil men hai
kyuun ayaan ho aankh se vo gham jo pinhan dil men hai
jis se chaho puchh lo tum mere soz-e-dil ka haal
sham.a bhi mahfil men hai parvana bhi mahfil men hai
ishq-e-gharat-gar ne shah di husn-e-afat-ḳhez ko
shauq-e-bismil hi se kas-bal bazu-e-qatil men hai
kuchh samajh kar hi hua huun mauj-e-dariya ka harif
varna main bhi janta huun afiyat sahil men hai
ḳhud tujhe aa ja.ega ashiq-navazi ka ḳhayal
tera rahrav kyuun ḳhayal-e-duri-e-manzil men hai
mudda.a-e-ishq mera kuchh nahin juz zauq-e-ishq
husn ko hairat ki ye kis sa.i-e-be-hasil men hai
apni shan-e-be-niyazi par tumhen kya kya hain naaz
kaash tum us shauq ko jaano jo mere dil men hai
Leave a Reply