Saurabh Shekhar
siyah raat ke dariya ko paar karte chalo
bas ek dusre ko hoshiyar karte chalo
ufuq ke nuur se gar mutma.in na ho paao
nasim-e-sub.h ka to e’tibar karte chalo
baTor laao zara ḳhud ko chaar samton se
safen bana ke baḌho ab qatar karte chalo
qayam ta.iro kuchh der mere angan men
tamam ghar ko mire ḳhush-gavar karte chalo
tumhari baat se mujh ko to ittifaq nahin
muḳhalifon men mujhe bhi shumar karte chalo
usuul ek hi hota hai sirf jangal ka
shikar bante raho ya shikar karte chalo
jo saltanat hai tumhari to lazmi hai kya
chaman tamam ko tum regzar karte chalo
ḳhulus ḳharch karo haath khol kar ‘saurabh’
luTao pyaar dil-o-jan nisar karte chalo
Leave a Reply