isi men khush huun mira dukh koi to sahta hai
chali chalungi jahan tak ye saath rahta hai
zamin-e-dil yunhi shadab to nahin ai dost
qarib men koi dariya zarur bahta hai
ghane darakhton ke girne pe ma-siva-e-hava
azab-e-dar-badri aur kaun sahta hai
na jaane kaun sa fiqra kahan raqam ho jaae
dilon ka haal bhi ab kaun kis se kahta hai
maqam-e-dil kahin abadiyon se hai bahar
aur is makan men jaise ki koi rahta hai
mire badan ko nami kha gai hai ashkon ki
bhari bahar men kaisa makan dhahta hai