ham pe sau zulm-o-sitam kijiyega
ek milne ko na kam kijiyega
bhagte khalq se kuchh kaam nahin
qasd hai aap se ram kijiyega
gar yahi zulf o yahi mukhda hai
gharat-e-dair-o-haram kijiyega
gar rahi yunhi gul-fishani-e-ashk
ja-ba-ja rashk-e-iram kijiyega
ji men hai aaj bajae maktub
yahi bait us ko raqam kijiyega
mehrbani se phir ai banda-navaz
kahiye kis roz karam kijiyega
niind avegi na tanha ‘bedar’
ta na khvab us se baham kijiyega
Leave a Reply