main ne shayad tumhen pahle bhi kahin dekha hai
ajnabi si ho magar ghair nahin lagti ho
vahm se bhi jo ho nazuk vo yaqin lagti ho
haae ye phuul sa chehra ye ghaneri zulfen
mere sheron se bhi tum mujh ko hasin lagti ho
main ne shayad tumhen pahle bhi kahin dekha hai
dekh kar tum ko kisi raat ki yaad aati hai
ek khamosh mulaqat ki yaad aati hai
zehn men husn ki thanDak ka asar jagta hai
aanch deti hui barsat ki yaad aati hai
main ne shayad tumhen pahle bhi kahin dekha hai
miri ankhon pe jhuki rahti hain palken jis ki
tum vahi mere khayalon ki pari ho ki nahin
kahin pahle ki tarah phir to na kho jaogi
jo hamesha ke liye ho vo khushi ho ki nahin
main ne shayad tumhen pahle bhi kahin dekha hai