Ejaz Gul
dar khol ke dekhun zara idrak se bahar
ye shor sa kaisa hai miri ḳhaak se bahar
rudad-e-guzishta to suni kuza-gari ki
farda ka bhi kar zikr jo hai chaak se bahar
ḳhush aaya ajab ishq ko ye jama-e-zeba
nikla nahin phir hijr ki poshak se bahar
chaha tha mafar dil ne magar zulf-e-girah-gir
pechak banati rahi pechak se bahar
aata nahin kuchh yaad ki ai sa.at-e-nisyan
kya rakkha tire taaq pe kya taaq se bahar
sunta huun kahin duur se naqqara saba ka
utri hai bahar ab ke bhi ḳhashak se bahar
kuchh der Thahar aur zara dekh tamasha
napaid hain ye raunaqen is ḳhaak se bahar
maujud ḳhala men hain agar aur zaminen
aflak bhi honge kahin aflak se bahar
Leave a Reply