koi milta nahin ḳhuda ki tarah
phirta rahta huun main dua ki tarah
gham ta.aqub men hain saza ki tarah
tu chhupa le mujhe ḳhata ki tarah
hai marizon men tazkira mera
azma.i hui dava ki tarah
ho rahin hain shahadaten mujh men
aur main chup huun karbala ki tarah
jis ki ḳhatir charagh banta huun
ghurta hai vahi hava ki tarah
vaqt ke gumbadon men rahta huun
ek gunji hui sada ki tarah
Leave a Reply