Kaun Kahta Hai Ki Maut Aai To Mar Jaunga

kaun kahta hai ki maut aai to mar ja.unga

main to dariya huun samundar men utar ja.unga

tera dar chhod ke main aur kidhar ja.unga

ghar men ghir ja.unga sahra men bikhar ja.unga

tere pahlu se jo utthunga to mushkil ye hai

sirf ik shaḳhs ko pa.unga jidhar ja.unga

ab tire shahr men a.unga musafir ki tarah

saya-e-abr ki manind guzar ja.unga

tera paiman-e-vafa raah ki divar bana

varna socha tha ki jab chahunga mar ja.unga

charasazon se alag hai mira meaar ki main

zaḳhm kha.unga to kuchh aur sanvar ja.unga

ab to ḳhurshid ko guzre hue sadiyan guzrin

ab use DhunDne main ta-ba-sahar ja.unga

zindagi shama ki manind jalata huun ‘nadim’

bujh to ja.unga magar sub.h to kar ja.unga

Leave a Comment