Hafeez Banarasi
hamare ahd ka manzar ajiib manzar hai
bahar chehre pe dil men ḳhizan ka daftar hai
na ham-safar na koi naqsh-e-pa na rahbar hai
junun ki raah men kuchh hai to jaan ka Dar hai
har ek lamha hamen Dar hai TuuT jaane ka
ye zindagi hai ki bosida kanch ka ghar hai
isi se laḌte hue ek umr biit ga.i
miri ana hi mire raste ka patthar hai
tamam jism hain jis ke ḳhayal men larzan
vo tirgi ka nahin raushni ka ḳhanjar hai
main ek qatra huun lekin mira nasib to dekh
ki be-qarar mire gham men ik samundar hai
usi ke pichhe ravan huun main pagalon ki tarah
vo ek shai jo miri dastaras se bahar hai
isi ḳhayal se milta hai kuchh sakun dil ko
ki na-suburi to is daur ka muqaddar hai
kabhi to is se mulaqat ki ghaḌi aa.e
jo mere dil men basa hai jo mere andar hai
uqab-e-zulm ke panje abhi kahan TuuTe
abhi to faḳhta-e-aman ḳhuun men tar hai
ḳhuda ki maar ho is jehl-e-agahi pe ‘hafiz’
ba-zo.am-e-ḳhud yahan har shaḳhs ik payambar hai
Leave a Reply