Poet
juun fauj ki maftuh ho zanjir men aave
alfaz ka lashkar miri tahrir men aave
ik ḳhaas inayat hai ki dete nahin mujh ko
vo dard ki jo panja-e-tadbir men aave
yaksar rag-e-mansur ki himmat se pare hai
vo ilm ki ik arsa-e-taqtir men aave
jo chahe bhare main ne musavvir se kaha tha
kuchh rang-e-mohabbat miri tasvir men aave
vo baat ḳhusha deta hai dil jis ki gavahi
ye kya ki kaho agli asatir men aave
jo hukm tumhara hai vo vajib hai bila-shak
jo arz hamari hai vo ta.azir men aave
hai garche bahut mere liye ḳhvab ki duniya
kuchh aur maza ḳhvab ki ta.abir men aave
jis paas mudava nahin kuchh ab-o-hava ka
lazim hai mire halqa-e-taqrir men aave
mumkin nahin aadam ke liye shan-e-ḳhuda.i
haan yuun ki magar aya-e-tat.hir men aave
Leave a Reply