Wamiq Jaunpuri
dil pareshan hai na jaane kis liye
hashr-saman hai na jaane kis liye
pur-sukun gahra.iyon men zabt ki
shor-e-tufan hai na jaane kis liye
laakh abad-e-tamanna ho ke dil
phir bhi viran hai na jaane kis liye
meri barbadi pe mera har nafas
zahr-ḳhandan hai na jaane kis liye
tishna-e-himmat jo tha zauq-e-fana
aaj asan hai na jaane kis liye
ḳhali az illat nahin un ka karam
mujh pe ehsan hai na jaane kis liye
dekhiye girti hai ye bijli kahan
vo pashiman hai na jaane kis liye
nau-e-insan fasl-e-azadi men bhi
pa-ba-jaulan hai na jaane kis liye
Leave a Reply