Dil Jab Se Tere Hijr Mein Bimar Pada Hai

dil jab se tire hijr men bimar pada hai

jiine se khafa jaan se be-zar pada hai

sauda na bana gesu-e-janan se to kya gham

le lenge kahin aur se bazar pada hai

parhez tap-e-hijr se hai tujh ko jo ai dil

tu aur bhi aage kabhi bimar pada hai

farmaiye roke se ruke hain kabhi ashiq

darvaze pe qufl aap ke sau baar pada hai

main dair o haram ho ke tire kuche men pahuncha

do manzilon ka pher bas ai yaar pada hai

ki tark-e-mohabbat to liya dard-e-jigar mol

parhez se dil aur bhi bimar pada hai

tauqir nahin anjuman-e-khas men dil ki

shisha tire mai-khana men bekar pada hai

kuchh sham-e-judai men sujhai nahin deta

parda khirad o hosh pe ai yaar pada hai

‘jauhar’ kahin bikti hi nahin jins-e-mohabbat

kya qaht vafa ka sar-e-bazar pada hai

Leave a Comment