Tauqeer Taqi
yaad aur gham ki rivayat se nikla hua hai
dil jo is vaqt mire haat se nikla hua hai
muḌ ke dekhe bhi to patthar nahin hota koi
jaane kya shahr-e-tilismat se nikla hua hai
raat ye kaun sa mehman mire ghar aaya
saara ghar halqa-e-afat se nikla hua hai
hujra-e-hijr men baiTha hai jo majzub-sifat
arsa-e-shor-e-munajat se nikla hua hai
lashkari gaanv pe shab-ḳhun nahin marenge
hausla gasht pe kal raat se nikla hua hai
mante kab hain bhala unche makanon vaale
shahr ka shahr mazafat se nikla hua hai
zar ka banda ho ki mahrumi ka maara hua shaḳhs
jis ko dekho vahi auqat se nikla hua hai
Leave a Reply