jagta rahta huun aur khiḌki khuli rahti hai
kya ḳhushi hai ki musibat hi paḌi rahti hai
itni divaren gira kar bhi yahi dekha hai
ek divar miri rah men khaḌi rahti hai
baagh men bikhre hue rang bahut zalim hain
ba.az goshon men to virani paḌi rahti hai
hijr men vasl ke phal-phul khile rahte hain
shaḳh bichhḌe hue mausam se bhari rahti hai
ek virana hai jo shahr ko kha jaata hai
ek basti hai jo jangal men basi rahti hai
ab vo ḳhush-chehra si ḳhatun kahan par hogi
fikr si koi mire ji ko lagi rahti hai
had se baḌhti hui vahshat bhi ajab shai hai ‘vafa’
mere chehre pe kisi gham ki hansi rahti hai
mausam-e-girya guzar jaata hai maqsud-‘vafa’
meri divar pe barish ki nami rahti hai
Leave a Reply