Aftab Iqbal Shamim
hazimaten jo fana kar gaiin ghurur mira
unhi ke dam se munavvar hua shuur mira
main hairati kisi mansur ki talash men huun
kare jo aa ke ye aina chuur chuur mira
rivaj-e-zehn se main ikhtilaf rakhta tha
sar-e-salib mujhe le gaya futur mira
vo ajnabi hai magar ajnabi nahin lagta
yahi ki us se koi rabt hai zarur mira
main duub kar bhi kisi daur men nahin duuba
raha hai matla-e-imkan men zuhur mira
use ab ahd-e-alam ki inayaten kahiye
ki zulmaton men ujagar hua hai nuur mira
main us lihaz se be-nam nam-avar huun
ki mere baad hua zikr duur duur mira
Leave a Reply