Bushra Ejaz
manzaron ke darmiyan manzar banana chahiye
rahnavard-e-shauq ko rasta dikhana chahiye
apne saare raste andar ki janib mod kar
manzilon ka ik nishan bahar banana chahiye
sochna ye hai ki us ki justuju hone talak
saath apne khud rahen ham ya zamana chahiye
teri meri dastan itni zaruri to nahin
duniya ko kahne ki khatir bas fasana chahiye
phuul ki patti pe likkhun nazm jaisi ik dua
haath uthane ke liye mujh ko bahana chahiye
vasl ki koi nishani hijr ke baham rahe
ab ke saada haath par mehndi lagana chahiye
phuul khushbu rang jugnu raushni ke vaste
ghar ki divaron men ik rauzan banana chahiye
shaam ko vapas palatte taeron ko dekh kar
sochti huun laut kar ab ghar bhi jaana chahiye
Leave a Reply