Niyaz Husain Lakhwera
agar kisi ne badan ka sukun paaya hai
vo shaḳhs ruuh ki tarikiyon men uljha hai
ḳhayal hai koi meri talash men hi na ho
tilsim-e-shab kisi avaz-e-pa se TuuTa hai
ye kis ki chaap dar-e-dil pe roz sunta huun
ye kis ka dhyan mujhe rat-bhar satata hai
kuchh is tarah se muqayyad huun apni hasti men
ki jaise main huun faqat main huun aur duniya hai
tumhare gham men koi aankh nam nahin hogi
hava ke karb ka ehsas kis ko hota hai
ye kaun zehn men chupke se roz aa ke ‘niyaz’
sukun-e-qalb-o-nazar pa.emal karta hai
Leave a Reply