Ahmad Tariq
vo mujhe mo’atabar na dekh saka
aur phir umr bhar na dekh saka
is ko manzil to dikh gai fauran
par vo daur-e-safar na dekh saka
kya bataun sitam-zarif ka haal
vo mujhe ik nazar na dekh saka
tujh ko kaise dikhai deta main
tu mujhe is qadar na dekh saka
vo mujhe baar baar udata raha
aur mire khasta par na dekh saka
mere malik ne bhar diya kaasa
vo mujhe dar-ba-dar na dekh saka
sab ke sab dekhte rahe tasvir
koi divar par na dekh saka
tu bhi dekh aa ke halat-e-‘ahmad’
aur iqrar kar na dekh saka
Leave a Reply