Mohsin Bhopali
vo barg-e-ḳhushk tha aur daman-e-bahar men tha
numud-e-nau ki basharat ke intizar men tha
miri rafiq-e-safar thiin hasad bhari nazren
vo asman tha aur mere iḳhtiyar men tha
bikhar gaya hai to ab dil nigar-ḳhana hai
ghazab ka rang us ik naqsh-e-e’tibar men tha
ab aa gaya hai to viraniyon par tanz na kar
tira makan isi ujḌe hue dayar men tha
likhe the naam mire qatl karne valon ke
ajiib baat hai main bhi isi shumar men tha
mujhe tha zo.am magar main bikhar gaya ‘mohsin’
vo reza reza tha aur apne iḳhtiyar men tha
Leave a Reply