Hamari Zist Ka Ek Ek Bab Khul Jae

hamari ziist ka ik ek baab khul jaa.e

ḳhudaya ham pe hamari kitab khul jaa.e

phir is ke ba.ad ye dasht-o-daman bhala kya hain

jo ghaur-o-fikr karen aftab khul jaa.e

zamin pe rasta aa.e nazar to kya hai ajab

ye rasta to miyan zer-e-ab khul jaa.e

ḳhatib chiḳhta hai roz hi sar-e-mimbar

majal kya hai jo ham par ḳhitab khul jaa.e

na jaane kab se dar-e-ḳhvab par hai qufl paḌa

ḳhudaya ab to koi ham pe baab khul jaa.e

hamare farz ka daftar to khol Daala hai

varaq huquq ka bhi ik janab khul jaa.e

‘obaid’ dena hai ham sab ko imtihan ik din

dua.en kiije ki ham par nisab khul jaa.e