Ehsan Danish
bana dengi duniya ko ik din sharabi
ye bad-mast anhken ye Dore gulabi
hain qasr-e-mohabbat ke me.amar donon
nigahon ka dhoka dilon ki ḳharabi
ye kufr-e-mujassam ye zuhd-e-sarapa
ye gunjan gesu ye ru-e-kitabi
har ik shai men tum muskurate ho goya
hazaron hijabon men ye be-hijabi
abhi tak nigahon pe chha.i hui hai
vo masti men Duubi hui nim-ḳhvabi
abas ishq ko intizar-e-asar hai
asar tak kahan aah ki baryabi
ba-juz us ke ‘ehsan’ ko kya samajhiye
baharon men khoya hua ik sharabi
Leave a Reply