kuchh ab ke baras aur havaon ka chalan hai
bojhal hai faza vaqt ke mathe pe shikan hai
deti hain dhuan ab bhi sulagti hui shamen
mahaul pe chha.i hui vaisi hi ghuTan hai
ubhri hai phir ik Dubte manzar ki koi yaad
sangit ki lai hai ki ye suraj ki kiran hai
nikhra hai tira ruup mire sheron men Dhal kar
sanvra hua mera bhi har ik naqsh-e-suḳhan hai
mahki hui sanson men basi hai koi murat
ḳhushbu-e-badan hai ki ye ḳhushbu ka badan hai
siine se laga lo ise palkon pe saja lo
ai ‘chand’ ye biite hue lamhon ki chubhan hai
Leave a Reply