ahmad-javed

Dil-e-Betab Ke Hamrah Safar Mein Rahna

dil-e-betab ke hamrah safar men rahna

ham ne dekha hi nahin chain se ghar men rahna

svang bharna kabhi shahi kabhi durveshi ka

kisi surat se mujhe us ki nazar men rahna

ek halat pe basar ho nahin sakti meri

jama-e-khak kabhi khilat-e-zar men rahna

din men hai fikr-e-pas-andazi-e-sarmaya-e-shab

raat bhar kavish-e-saman-e-sahar men rahna

dil se bhage to liya dida-e-tar ne goya

aag se bach ke nikalna to bhanvar men rahna

ahl-e-duniya bahut aram se rahte hain magar

kab mayassar hai tiri rahguzar men rahna

vasl ki raat gai hijr ka din bhi guzra

mujhe varaftagi-e-hal-e-digar men rahna

kar chuka hai koi aflak o zamin ki takmil

phir bhi har aan mujhe arz-e-hunar men rahna

More Poems

Leave a Comment