Poet
mohabbat ko jo zahir kar rahi hai
mire chehre pe vo tahrir bhi hai
huiin sadiyan nazar ke zalzalon ko
abhi tak shahr ki halat vahi hai
ujagar jab bhi us ke gham hue hain
na.e ruḳh se ghazal main ne kahi hai
agar gahra nahin hai zaḳhm-e-ehsas
hamare sochne men kuchh kami hai
hava-e-zulm ke jhonke idhar bhi
mire dil men bhi shauq-e-agahi hai
tire anjan bhi tere shanasa
hamara ashna bhi ajnabi hai
main tere zulm ka radd-e-amal huun
mira paigham sulh-o-ashti hai
kahavat ban chuki hai jis ki vahshat
‘nazar’ hi ek aisa aadmi hai
Leave a Reply