Saeed Qais
ḳhushi mili to bahut hi udaas baiThe rahe
chala gaya vo to ham us ke paas baiThe rahe
jamal-e-yar ki lazzat bayan kya karte
nazar men shauq badan men hiras baiThe rahe
barahnagi hi kuchh aisi thi shahr-e-ghurbat ki
qaba pahan ke bhi ham be-libas baiThe rahe
ye vaqi.a miri ankhon ke samne ka hai
sharab naach rahi thi gilas baiThe rahe
isi ko husn-e-nazar ka kamal kahte hain
tamam shab tire lazzat-shanas baiThe rahe
Thahar Thahar ke vo dariya bula raha tha ‘qais’
ham apni ankhon men bhar bhar ke pyaas baiThe rahe
Leave a Reply