Ambareen Haseeb Ambar
ik gali se khushbu ki rasm-o-rah kaafi hai
laakh jabr mausam ho ye panah kaafi hai
niyyat-e-zulekha ki khoj men rahe duniya
apni be-gunahi ko dil gavah kaafi hai
umr-bhar ke sajdon se mil nahin saki jannat
khuld se nikalne ko ik gunah kaafi hai
asman pe ja baithe ye khabar nahin tum ko
arsh ke hilane ko ek gunah kaafi hai
pairvi se mumkin hai kab rasai manzil tak
naqsh-e-pa mitane ko gard-e-rah kaafi hai
chaar din ki hasti men hans ke ji liye ‘amabar’
be-nashat duniya se ye nibah kaafi hai
Leave a Reply