hal-e-dil tum se miri jaan na kaha kaun se din
mere kahne ko bhala tum ne suna kaun se din
lazzaten vasl ki kuchh main ne bayan kiin to kaha
aap ke vaste din aisa hua kaun se din
jab kaha main ne vo kya din the jo milte the tum
ho ke anjan ajab dhab se kaha kaun se din
vasl ki shab hai milo aaj to dil khol ke khuub
ai miri jaan ye jaegi haya kaun se din
rashk-amez jo kuchh main ne kaha to bole
ghair ke saath mujhe dekh liya kaun se din
har ghadi dil men raha khauf bigad jaane ka
tere milne men maza ham ko mila kaun se din
kaun sa din hai jo bechain nahin ho ke ‘nizam’
be-qarari se na us dar pe gaya kaun se din
Leave a Reply