dil ko kya yaar ke paikan liye baiThe hain
sahab-e-ḳhana ko mehman liye baiThe hain
shor kyunkar na lab-e-zaḳhm-e-jigar se uTThe
sunte hain phir vo namak-dan liye baiThe hain
dam labon par hai yahan shauq-e-shahadat mera
ghar men vo ḳhanjar-e-burran liye baiThe hain
sog ne un ke hazaron ko kiya sauda.i
vo abhi zulf-e-pareshan liye baiThe hain
dil-e-pur-dagh se bahlate hain ji ko us bin
ham ye pahlu men gulistan liye baiThe hain
uThte hi pahlu se us parda-nashin ke ham bhi
chashm par gosha-e-daman liye baiThe hain
kal to ka.abe ko chale hazrat-e-‘tanvir’ the lo
aaj mai-noshi ka saman liye baiThe hain
Leave a Reply