saa.il ke labon par hai dua aur tarah ki
aflak se aati hai sada aur tarah ki
hai ziist agar jurm to ai munsif-e-alam
jurm aur tarah ka hai saza aur tarah ki
is dil men hai mafhum-e-karam aur tarah ka
us dil men hai tafhim-e-vafa aur tarah ki
phulon ka tabassum bhi vo pahla sa nahin hai
gulshan men bhi chalti hai hava aur tarah ki
dete hain faqiron ko saza aaj bhi ‘kaifi’
log aur tarah se to ḳhuda aur tarah ki
Leave a Reply