main kaise lauT ke ja.unga apne ghar yaaro
ke mere qadmon se lipTi hai rahguzar yaaro
na raas aa.ega mujh ko koi shajar yaaro
abhi tavil bahut hai mira safar yaaro
abhi to shanon pe qaa.em hai mera sar yaaro
junun nahin hai abhi mera mo’atabar yaaro
sitam to dekhiye parvaz ki dua de kar
kutar raha hai koi mere bal-o-par yaaro
vo ek lamha ki jo hasil-e-hayat bane
talash karta hai insan umr-bhar yaaro
main asman huun bulandi maqam hai mera
jhuka.e phirta huun phir bhi main apna sar yaaro
tamam-umr ka hasil hansi ghaḌi-bhar ki
kahan se laa.e koi phuul ka jigar yaaro
Leave a Reply