Kis Buri Saat Se Khat Le Kar Gaya

kis buri saaat se khat le kar gaya

nama-bar ab tak na aaya mar gaya

jaate hi dil us gali men mar gaya

marne vaala bevafai kar gaya

dil to jaane ko gaya lekin mujhe

us bhari mahfil men rusva kar gaya

hasraten thiin jiine vaali ji gaiin

marne vaala tha dil apna mar gaya

gham ki lazzat ibtida men thi magar

is qadar khaya ki ab ji bhar gaya

har nivala us ka ab to talkh hai

umr nemat thi magar ji bhar gaya

kya kahun ahval uthti bazm ka

pahle miina baad ko saghar gaya

dil ne ik din bhi na dekha tujh ko aah

us gali tak khvab men aksar gaya

marne vaale dil tujhe ab kya kahun

khair bakhsha main ne jo kuchh kar gaya

kya kahun in ansuon ka zor o shor

ankhen jhapki thiin ki chullu bhar gaya

dil gila karta tha khuub us shokh ka

tazkira mahshar ka sun kar Dar gaya

jis jagah daara ko bheja tha vahin

kuchh dinon ke baad askandar gaya

jis ka kahlata hai vaan thi kya kami

ai gada kyuun mangne dar-dar gaya

dil ne sabqat ki havas o sabr par

pahle sultan baad ko lashkar gaya

munh se nikla tha ki pahuncha arsh par

nala-e-dil naam uncha kar gaya

dil ye umDa mai se khali dekh kar

jaam ashkon se labalab bhar gaya

gir na jaae khaak par qatra koi

bas bas ai saaqi ki saghar bhar gaya

mai-kasho matam karo ab ‘shad’ ka

haae kya mai-khvar rahlat kar gaya

‘shad’ kya kuchh kam hain do kam saath saal

zindagi se bas dil apna bhar gaya

Leave a Comment