khol aankh zamin dekh falak dekh faza dekh!
mashriq se ubharte hue suraj ko zara dekh!
is jalva-e-be-parda ko parda men chhupa dekh!
ayyam-e-judai ke sitam dekh jafa dekh!
betab na ho marka-e-bim-o-raja dekh!
hain tere tasarruf men ye badal ye ghataen
ye gumbad-e-aflak ye khamosh fazaen
ye koh ye sahra ye samundar ye havaen
thiin pesh-e-nazar kal to farishton ki adaen
aina-e-ayyam men aaj apni ada dekh!
samjhega zamana tiri ankhon ke ishare!
dekhenge tujhe duur se gardun ke sitare!
napaid tire bahr-e-takhayyul ke kinare
pahunchenge falak tak tiri aahon ke sharare
tamir-e-khudi kar asar-e-ah-e-rasa dekh
khurshid-e-jahan-tab ki zau tere sharar men
abad hai ik taaza jahan tere hunar men
jachte nahin bakhshe hue firdaus nazar men
jannat tiri pinhan hai tire khun-e-jigar men
ai paikar-e-gul koshish-e-paiham ki jaza dekh!
nalanda tire uud ka har taar azal se
tu jins-e-mohabbat ka kharidar azal se
tu pir-e-sanam-khana-e-asrar azal se
mehnat-kash o khun-rez o kam-azar azal se
hai rakib-e-taqdir-e-jahan teri raza dekh!
the Spirit of the Earth Welcomes Adam
Leave a Reply