siyasat jab zarurat ho naya rishta banati hai
koi kitna muḳhalif ho use apna banati hai
shanasa ḳhauf ki tasvir hai us ki bayazon men
miri beTi hasin pinjre men ik chiḌiya banati hai
taḳhayyul harf men Dhal kar ubhar aata hai kaghaz par
sarapa sochta huun main ghazal chehra banati hai
kisi par mehrban hoti hai jab bhi daulat-e-duniya
use sahab use qibla use kya kya banati hai
haqiqi sha.iri dad-e-suḳhan se bhi hui mahrum
bila sar-pair vaali sha.iri paisa banati hai
gavara kab hai mamta ko mira yuun dhuup men chalna
miri maan oḌhni phaila ke ik chhata banati hai
ye achchha.i men bhi ‘sabir’ bura.i DhunD leti hai
ye duniya hai alif par bhi kabhi shosha banati hai
Leave a Reply