dariya-e-mohabbat men maujen hain na dhara hai
yuun shauq-e-maratib ne pasti men utara hai
is shahar-e-taghaful men ham kis ko kahen apna
vo shahr jo duniya men kahne ko hamara hai
a.ankhon men kabhi the ab, hathon men hain bachchon ke
suraj hai ki chanda hai, jugnu hai ki taara hai
vo husn-e-mujassam jab guzra hai chaman se tab
ḳhud apna sarapa bhi phulon ne sanvara hai
aa jaate ho kyuun aḳhir yuun ḳhvab na.e le kar
is shahr-e-tazabzub men kya hai jo tumhara hai
mar.ub huiin qadren jab apni yahan, ham ne
maghrib ke darichon se mashriq ko ubhara hai
ab jaa.en to pahchane shayad hi vahan koi
vo des jahan ham ne ik arsa guzara hai
naale to kahin ahen, ik hashr sa hai har su
hai kaun jo duniya se is tarah sidhara hai
ham rahne lage ‘ḳhalid’ ḳhvabon ke jaziron men
puchha tha kabhi us ne kya naam tumhara hai
Leave a Reply