Ek Chand Tirgi Mein Samar Raushni Ka Tha

ik chāñd tīrgī meñ samar raushnī kā thā

phir bhed khul gayā vo bhañvar raushnī kā thā

sūraj pe tū ne aañkh tarerī thī yaad kar

bīnā.iyoñ pe phir jo asar raushnī kā thā

sab chāñdnī kisī kī ināyat thī chāñd par

us dāġhdār show pe kavar raushnī kā thā

maġhrib kī mad-bharī huī rātoñ meñ kho gayā

is ghar meñ koī laḳht-e-jigar raushnī kā thā

dariyā meñ us ne Duub ke kar lī hai ḳhud-kushī

jis shai kā āsmāñ pe safar raushnī kā thā

zarre ko āftāb banāyā thā ham ne aur

dhartī pe qahr shām-o-sahar raushnī kā thā

Leave a Comment